Ökumenn Virgin, Jerome D'Ambrosio og Timo Glock, á æfingu í Spa.

Virginliðið mun mæta til leiks í ítalska kappakstrinum í Monza með umfangsmiklar uppfærslur í keppnisbíl sínum.

Til stóð að taka búnaðinn í notkun í breska kappakstrinum en því var frestað vegna mikillar uppstokkunar í tæknideild liðsins og mannabreytinga. Það er að baki og nýr tæknistjóri, Pat Symonds, hefur yfirfarið hinar ráðgerðu uppfærslur og samþykkt.

Symonds er á því að uppfærslurnar muni skila talsverðum framförum hvað bílhraða varðar. Um er að ræða nýja hlíf á vélarhúsinu, nýja hliðarbelgi, nýja útfærslu á pústkerfinu og breytta botnplötu á aftari helmingi bílsins.

Þá verður sérlegur vængur fyrir aðstæður í Monza. Að honum frátöldum verður hinn nýi búnaður á bílnum það sem eftir er vertíðar. Með breytingunum mun afturendinn verða mun aðskornari en hingað til.

Timo Glock á Virgin á ferð í ungverska kappakstrnium. reuters