Kraðak í fyrstu beygju í Monza vegna hópáreksturs. reuters

Tonio Liuzzi hjá Hispania hefur verið refsað fyrir að vera valdur að hópárekstri í fyrstu beygju eftir ræsinguna í ítalska kappakstrinum í Monza sl. sunnudag.

Hirtingin er fólgin í því að færa hann aftur um fimm sæti á rásmarkinu að tímatökunum loknum í næsta móti, í Singapúr.

Liuzzi missti stjórn á bíl sínum er hann bremsaði fyrir beygjuna með þeim afleiðingum að bíllinn fór út fyrir brautina, út á gras og rann óviðráðanleg inn í beygjuna á mikilli ferð og á aðra bíla.

Liuzzi varð að hætta keppni á staðnum og einnig þeir Nico Rosberg hjá Mercedes og Vitaly Petrov hjá Renault. Þá skemmdust bílar Sebastien Buemi hjá Toro Rosso og  Rubens Barrichello hjá Williams.

Kraðak í fyrstu beygju í Monza vegna hópáreksturs. reuters

Ólíklegt er að afturfærslan muni nema svo mörgum sætum eins og refsingin hljóðar upp á því Hispaniabíllinn hefur ekki haft burði umfram það að vera í allra síðustu sætum. Þannig hóf Liuzzi keppni aftastur í Monza.

Liuzzi gengur frá braki Hispaniabílsins. reuters