Vettel ánægður með ráspólinn í Nýju-Delhí. reutres

Sebastian Vettel hjá Red Bull var í þessu að krækja í 13. ráspól sinn á vertíðinni af 17 mögulegum í tímatökum indverska kappakstursins. Lewis Hamilton á McLaren varð annar en hefur keppni í fimmta sæti vegna refsingar. Þriðji varð Mark Webber á Red Bull.

Ráspóllinn er sá 28. á ferli Vettels og með honum hefur bíll Red Bull keppni af fremstu rásröð 22. mótið í röð. Segir það mikið um ágæti bílhönnuðarins annálaða, Adrians Newey. Og báðir bílar liðsins verða á fremstu rásröð á morgun vegna refsingar Hamiltons, hennar vegna færist Webber upp í annað sætið.

Heimsmeistarinn var eiginlega í sérflokki í annarri og þriðju lotu tímatökunnar og seinni tilraun Hamiltons til að velta honum úr sessi mistókst. Annars voru tímatökurnar mun jafnari en æfingarnar og var Fernando Alonso á Ferrari t.d. aðeins 11 þúsundustu úr sekúndu á eftir Webber og hefur keppni af þriðja rásstað.

Félagi hans Felipe Massa varð fyrir því óláni í seinni tímatilraun sinni í lokalotunni að fjöðrun hægra framhjóls brotnaði er hann missti bílinn of langt út fyrir bríkurnar í beygju. Hafnaði hann á öryggisvegg. Þrátt fyrir það hélt hann sjötta sæti.

Þrír ökumenn óku ekki neitt í lokalotunni til að spara dekkjaforða sinn fyrir keppnina á morgun. Adrian Sutil á Force India fékk áttunda sætið á rásmarkinu og Toro Rosso mennirnir þau tvö næstu,  Jaime Alguersuari og Sebastien Buemi.

Vitaly Petrov á Renault ber líklega harm sinn í hljóði yfir að komast ekki í lokalotuna en hann varð 11. á nákvæmlega sama tíma upp á þúsundasta úr sekúndu og Alguersuari sem varð fyrri til og hlaut því tíunda og síðasta sætið inn í lokalotuna. Petrov færist aftur um fimm sæti á morgun, í það 16. vegna refsingar sem hann hlaut fyrir að keyra á Michael Schumacher hjá Mercedes í kóreska kappakstrinum fyrir hálfum mánuði.

Schumacher reið ekki feitum hesti frá tímatökunum í Buddh-brautinni við Nýju Delhí, varð aðeins 12. í annarri lotunni og komst því ekki í keppnina um 10 fremstu sætin á rásmarkinu. Til marks um hve keppnin var jöfn var Schumacher aðeins 18 þúsundustu úr sekúndu frá því að komast í lokalotuna.

Niðurstaða tímatökkunar - og þar með rásröð morgundagsins - varð sem hér segir:

Vettel var brosmildur eftir 13. ráspólinn á árinu. reuters

Í Nýju-Delhí á morgun hefur bíll Red Bull keppni af fremstu rásröð 22. mótið í röð. reuters