Alonso varð að ganga heim í skúr eftir að vélin gaf sig á fyrri æfingunni. reuters

Fernando Alonso hjá Ferrari vonar að hann rigni í Interlagosbrautinni þar sem það muni hleypa miklu fjöri í Brasilíukappaksturinn og auka meðal annars möguleika hans sjálfs á sigri. 

Michael Schumacher hjá Mercedes segir að „óvæntir“ hlutir gætu gerst gangi veðurspár eftir en í þeim er gert ráð fyrir regni þegar kappaksturinn fer fram á sunnudag.

Munur á ökumönnum var lítill á æfingunum í dag og því talið að væta myndi hleypa miklu fjöri í keppnina. Schumacher hefur 10 sinnum staðið á verðlaunapalli í Sao Paulo og þar af  farið fjórum sinnum með sigur af hólmi í Interlagosbrautinni.

Schumacher var aðeins 0,3 sekúndum frá besta brautartíma Lewis Hamilton hjá McLaren í dag og m.a. fljótari í förum en Felipe Massa á Ferrari og Jenson Button á McLaren. Bindur hann vonir við vætu í tímatökunum þar sem það gæti aukið möguleika Mercedes á góðum árangri.

Alonso var aðeins 0,2 sekúndum á eftir Hamilton en segir of snemmt að segja um samkeppnisfærni Ferrarifáksins eftir æfingarnar í dag. Hann átti við ýmis tæknivandamál að stríða í dag og m.a. gaf vélin sig á fyrri æfingunni. Hann segir þó, að eini möguleiki sinn á sigri sé að hann rigni, annað hvort í tímatökunum eða kappakstrinum.

Michael Schumacher í Sao Paulo. reuters

Vélin gaf sig í bíl Fernando Alonso á fyrri æfingunni í Sao Paulo. reuters