Vettel setti ráspólamet í Sao Paulo í dag. reuters

Sebastian Vettel nýtti síðasta tækifærið sem hann hafði til að slá 19 ára gamalt ráspólamet breska ökuþórsins Nigels Mansell, sem vann 14 póla árið 1992. Það met jafnaði Vettel í indverska kappakstrinum fyrir mánuði en í dag bætti hann um betur og vann 15. ráspólinn á árinu í tímatökunum í Sao Paulo rétt í þessu.

Mansell hafði ekki eins mörg tækifæri til að vinna póla og Vettel; mótin voru mun færri 1992 en í dag. Met setti yngsti heimsmeistari sögunnar engu að síður í dag og útlit er fyrir að það standi lengi.

Vettel setti í leiðinni besta brautartíma helgarinnar til þessa. Hann er því í góðri stöðu til að reyna aka til sigurs og vinna sinn 12. kappakstur á árinu.

Báðir bílar Red Bull, meistaraliðs bílsmiða annað árið í röð, hefja keppni á fremstu rásröð Interlagosbrautarinnar á morgun þar sem Mark Webber varð annar í tímatökunum í dag. Víst má búast við því að Webber verði honum skeinuhættur því hann freistar þess að vinna sig upp í annað sætið í keppninni um heimsmeistaratitil ökuþóra, en til þess dugar honum ekkert minna en sigur þar sem hann er 22 stigum á eftir Jenson Button hjá McLaren.

Button hefur keppni næst Webber þar sem hann varð þriðji í tímatökunum, næst á undan liðsfélaga sínum Lewis Hamilton sem hefur keppni í fjórða sæti. Fernando Alonso á Ferrari varð fimmti, Nico Rosberg á Mercedes sjötti, heimamaðurinn Felipe Massa á Ferrari sjöundi, Adrian Sutil á Force India áttundi, annar heimamaður, Bruno Senna á Renault varð níundi og úr 10. sæti á morgun leggur Michael Schumacher á Mercedes af stað.