Adrian Sutil leitar fyrir sér annars staðar en hjá Force India. mbl.is/forceindiaf1

Adrian Sutil hefur staðfest, að hann freisti þess að fá vinnu annars staðar en hjá Force India liðinu þar sem allar líkur séu á því að liðið muni ekki ráða hann fyrir næsta ár.

Allt þykir stefna í að Force India haldi í Skotann Paul Di Resta - sem þykir hafa staðið sig afburða vel í ár - og veiti Nico Hülkenberg stöðuhækkun og geri hann að keppnisþór, en hann var varaökumaður liðsins í ár.

Sutil hefur verið hjá Force India um árabil og færði liðinu 42 stig í keppni í ár og sjötta sætið í keppninni um heimsmeistaratitil bílsmiða. Hann hafði litið vonaraugum til Renault en þar hefur verið skipað í bæði sæti með ráðningu Kimi Räikkönen og Romain Grosjean.

Eitt sæti er formlega laust hjá Williams sem aðeins hefur staðfest Pastor Maldonado sem keppnisþór á næsta ári. Óvíst þykir að Rubens Barrichello haldi sætinu en fari svo gæti Sutil verið ákjósanlegur eftirmaður hans vegna margra ára reynslu sinnar.

„Já, ég hef átt í viðræðum við nokkur lið en ekkert hefur verið undirritað enn,“ segir Sutil við tímaritið Speed-Magazin. „Williams er með laust sæti en ég get ekkert tjáð mig um viðræðurnar við það. Vonandi liggur niðurstaða þó fyrir ekki seinna en um miðjan desember,“ bætti hann við.