JJ Lehto í fangelsi fyrir sjóslys

Jyrki Järvilehto, öðru nafni JJ Lehto.

Finnski ökuþórinn JJ Lehto sem keppti í formúlu-1 á árunum 1988 til 1994 hefur verið dæmdur í tveggja ára og fjögurra mánaða fangelsi fyrir þátt sinn í sjóslysi sem leiddi til dauða vinar hans.

Sjálfur slasaðist Lehto er báturinn sigldi á brúarundirstöðu í þröngri á skammt frá bænum Rassepori í Finnlandi. Dómstóll komst að þeirri niðurstöðu að hann hafi verið ölvaður undir stýri og siglt vel yfir leyfilegum siglingahraða er slysið átti sér stað, í júní í fyrra.

Var báturinn talinn hafa verið á að minnsta kosti 80 km/klst hraða er hann rakst utan í brúna en þar er leyfilegur siglingahraði aðeins 5 km/klst.

Lehto neitaði ætíð sök og sagðist ekki hafa siglt bátnum. Ráðið var af áverkum hans að hann hafi setið undir stýri en ekki félagi hans. Ökuþórinn hefur ákveðið að áfrýja dómnum.

Besti árangur Lehto í keppni í formúlu-1 var þriðja sæti í kappakstrinum í San Marínó árið 1991. Var hann þó hring á eftir fyrsta bíl. Lehto keppti 62 sinnum og ók m.a. fyrir Sauber og  Benetton. Hann var liðsfélagi Michaels Schumacher hjá síðarnefnda liðinu 1994. Síðar sneri hann sér að sportbílakappakstri og varð m.a. sigurvegari í sólarhringskappakstrinum í Le Mans í Frakklandi með McLaren 1995 og Audi 2005.