Margir tæknimenn fara þessa dagana frá McLaren til Ferrari. reuters

Ferrari hefur fengið mikinn meðafla með þeim feng sínum sem í tæknistjóranum Pat Fry fólst, en hann réði liðið til sín í fyrra frá McLaren. Í kjölfarið hafa tæknimenn streymt frá McLaren til Ferrari.

Gárungar segja að með þessu hafi Ferrari hefnt njósnamálsins frá 2007 er þáverandi aðalhönnuður McLaren komst yfir tæknilýsingar keppnisbíls ítalska liðsins. Endaði það með þungri refsingu fyrir enska liðið.

Fry átti langan og farsælan starfsferil hjá McLaren en hann breytti um og fór til Ferrari í fyrra. Í uppstokkunum í tæknideildum ítalska liðsins var hann gerður að tæknistjóra. 

Að sögn íþróttablaðsins Corriere dello Sport hafa háttsettir tæknimenn og fyrrum samstarfsmenn Fry undanfarnar vikur ákveðið að skipta um skipsrúm og vinna að nýju með Fry. Eru tilgreindir mikilsvirtir verkfræðingar á borð við Rupad Darekar, Jonathan Heal, Ioannis Veloudis, Lawrence Hodge og Giacomo Tortora.

Og finnska blaðið Turun Sanomat skýrir frá því að yfirmaður í loftaflsdeild McLaren, Marcin Budkowski, sé á förum til Ferrari. Á bloggsíðunni F1Enigma vísar Jonathan Neale, framkvæmdastjóri McLaren, því á bug og segir að Budkowski sé aðeins í „verðskulduðu“ fríi og muni snúa aftur til starfa í bílsmiðjunni í Woking síðar á árinu.