Räikkönen í Paul Ricard við æfingar á Ferraribíl. ap

Yfirvofandi er að staðfest verði formlega, að franski kappaksturinn verði aftur á mótaskrá formúlu-1 árið 2013. Að sögn blaðsins Le Figaro er málið það langt komið að mótið hefur verið dagsett 1. september það ár.

Efnt hefur verið til samstarfs við belgíska kappaksturinn og stefnir allt í að til skiptis verði keppt í löndunum tveimur. Notast verður við Paul Ricard-brautina sem er skammt frá frönsku Miðjarðarhafsborgunum Marseille og Toulon.

Byggja verður nýjar áhorfendastúkur áður en að keppni kemur því lítið er af þeim sem stendur. Ætlunin er að reisa stúkur er taka 50.000 manns í sæti.

Í dag eru engin áform um að byggja keppnisbraut í grennd við París. Öll áform í þá veru síðustu ár hafa runnið út í sandinn. Og vegna samkeppni milli svæða verður tæpast hreyft við slíkum málum fyrr en eftir forsetakosningarnar í vor.

Afrennslissvæðin í Paul Ricard eru óneitanlega óvenjuleg.

Franski kappaksturinn fór síðast fram árið 2008, í Magny Cours.