2012-bíll Ferrari féll á árekstursprófi. reuters

Ferrari hefur einsett sér að slá Red Bull við á árinu og hefur því hannað nýjan keppnisbíl af mikilli dirfsku. Hefur liðið fengið bakslag í seglin í þessum tilraunum sínum því smíðiseintak af bílnum féll á höggprófi.

Hermt er, að bíllinn hafi verið afhentur til prófana fyrir nokkrum vikum og vegna útkomunnar hafi Ferrari orðið að endurskoða hönnunarforsendur hans og styrkja grind hans áður en hann verður prófaður að nýju í næstu viku.

Samkvæmt hertum tæknireglum formúlu-1 verða keppnisbílar liðanna að hafa staðist áreksturs- og höggprófanir Alþjóða akstursíþróttasambandsins (FIA) áður en þeir fá að taka þátt í æfingum og þróunarakstri í aðdraganda keppnistíðarinnar.

Skýrt hefur verið frá því að 2012-bílar bæði Caterham (áður Lotus) og Force India hafi staðist prófanirnar í fyrstu tilraun.

Stefano Domenicali liðsstjóri Ferrari hefur varað aðdáendur liðsins við og sagat þeim að búast ekki við sérdeilis aðlaðandi bíl. Virðist Ferrari því hafa farið alveg nýjar leiðir í tilraunum sínum við smíði bíls sem ætlað er að skáka bæði Red Bull og McLaren.

„Hann er ólíkur því sem verið hefur og táknar algjöran aðskilnað frá fyrri tíð hvað hönnunarheimspeki varðar,“ segir Domenicali. „Hann er ekki svo fallegur því lögunin sem nýjar tæknireglur útheimta veita ekki mikið svigrúm. En við vonum alla vega að hann verði hraðskreiður, það er það sem gildir,“ bætir liðsstjórinn við.