Alonso á ferð á Renault í Katalóníuhringnum í Barcelona. ap

Stjórn Katalóníuhéraðs á Spáni íhugar þessa dagana fýsileika þess að standa fyrir árlegu móti í formúlu-1 í Barcelona. Í ljósi mikils fjárhagsvanda héraðsins og krafna ríkisstjórnar um niðurskurð, aðhald og skuldalækkun vegna kreppu gæti kappaksturinn horfið af mótaskránni.

Spænska ríkið hækkaði skatta og lækkaði laun opinberra starfsmanna í glímunni við gríðarlega efnahagsörðugleika. Og nú er boðað að sjúklingar verði að taka meiri og stærri þátt í lyfja-og lækningakostnaði en fyrr. Í ljósi þess þykir mörgum óverjandi að verja tugum milljóna dollara í að halda keppni í formúlu-1 ár hvert.

Andreu Mas-Colell efnahagsráðherra Katalóníu segir að mótshald við núverandi efnahagsástand verði skoðað, réttlæta þyrfti nú orðið hverra einustu evru útgjalda héraðsins.

Katalóníubrautin er með samning um árlegt mót í bæði formúlu-1 og HM á mótorhjólum út árið 2016 en keppt hefur verið þar í þessum greinum frá 1991 og 1992. Mas-Colell segir að tryggja verði að það kosti ekki meira að rifta samningum en halda mótið.