Adrian Sutil. mbl.is/forceindiaf1

Þýski ökuþórinn Adrian Sutil þarf að mæta fyrir rétt og svara þar til saka en hann er ákærður fyrir líkamsárás. Þetta getur hugsanlega gert út um vonir hans um að halda velli sem ökumaður í formúlu-1.

Sutil er meðal ökumanna sem vomað hefur yfir lausu sæti hjá Williams. Hann réðst á einn helsta eiganda Renaultliðsins, Eric Lux, á næturklúbbi eftir kínverska kappaksturinn á nýliðnu ári. Rak hann bjórglas í höfuð hans en glasið brotnaði og þurfti 24 spor til að loka þeim skurðum sem hann hlaut. Mun hann naumlega hafa sloppið við alvarlegan skaða.

Lux mun hafa beðið Sutil að yfirgefa klúbbinn vegna atviks en þar var samkvæmi haldið fyrir gesti Renaultliðsins. Segir hann ökuþórinn hafa brugðist við því með því að slá þungu glasi í höfuð sér. Sutil kveðst hins vegar aldrei hafa ætlað að slá hann með glasinu heldur skvetta úr því á hann eftir að hafa sjálfur fengið yfir sig drykk frá einum gesti Lux.

Sigurvegari kínverska kappakstursins, Lewis Hamilton, var í klúbbnum þegar atvikið gerðist og er talið að hann þurfi að bera vitni fyrir rétti.