Alonso í ísakstri á körtu til fjalla á Ítalíu í gær. reuters

Fernando Alonso hjá Ferrari er á því að komandi formúluvertíð gæti orðið einstaklega skemmtileg í ljósi þess að hvorki fleiri né færri en sex heimsmeistarar verða í keppni. Svo margir hafa þeir aldrei verið áður.

Er hér um að ræða núverandi heimsmeistara, Sebastian Vettel, og þá Michael Schumacher,  Kimi Räikkönen, Lewis Hamilton og Jenson Button auk Alonso.

„Þetta er mikilsvert og frábærir tímar sem við eigum. Við verðum bara að njóta þeirra því við vitum ekki hversu miklu lengur við getum allir keppt og vitum heldur ekki hversu oft við fáum að sjá svo marga meistara samtímis í keppni,“ sagði Alonso við breska sjónvarpið, BBC.

„Þetta færir mótin og titilkeppnina á hærra plan en nokkru sinni áður. Við munum njóta hennar, áhorfendur munu njóta keppninnar. Mótin gætu orðið tvísýn og þrungin spennu,“ bætti Alonso við.