Alonso hefur trú á Kubica.

Fernando Alonso kveðst „öruggur“ um að Robert Kubica eigi eftir að snúa aftur til keppni í formúlu-1 og staðfesta, að hann „sé besti ökuþórinn“.

Kubica hefur verið fjarverandi formúluna í um eitt ár í kjölfar alvarlegs slyss í ralli í febrúar í  fyrra. Bataferli hans og hugsanleg endurkoma beið hnekki í síðustu viku er hann hrasaði og féll í hálku skammt frá heimili sínu með þeim afleiðingum að fótbrot í rallslysinu opnaðist aftur.

Þótt engar fregnir hafi farið af því hvaða afleiðingar nýja óhappið kunni að hafa velkist  Alonso ekki í vafa. Hann hefur fulla trú á því að hinn góði vinur hans snúi aftur.

„Robert er besti ökumaðurinn sem völ er á og það mun hann staðfesta þegar hann mætir aftur til keppni.“ Og hvað orðróm um að hann gæti verið á leið til Ferrari í stað Felipe Massa á næsta ári segir Alonso: „Að fá hann sem liðsfélaga? Ég er mjög ánægður með Felipe sem liðsfélaga“.