Renault, nú Lotus, í lokamótinu í Abu Dhabi. reuters

Lotusliðið, áður Renault, hefur þróað nýstárlega fjöðrun í formúlubíl sinn sem líklegt þykir að önnur lið muni herma eftir þar sem Alþjóða akstursíþróttasambandið (FIA) hefur lagt blessun sína yfir hana.

Um er að ræða svonefnda gagnvirka fjöðrun sem stuðlar að því að vegfirð er ætíð jöfn þegar bílnum er bremsað á leið inn í beygjur. Fjöðrunarbúnaðurinn er rafrænt tengdur bremsukerfinu og bregst við breytingum á svonefndu bremsumætti; bremsutorki.

Fjöðrunarkerfi þetta var fyrst borið undir FIA árið 2010 er Renault vann að þróun þess. Bann er lagt við því að ökumaður hafi áhrif á vegfirð með beinni íhlutun, til dæmis með því að virkja fjöðrunina með aðgerð í  stjórnklefanum. Hann á hins vegar engan hlut að máli í hinu gagnvirka fjöðrunarkerfi Lotusbílsins.

Með þessum fjöðrunarbúnaði verður loftafl bílsins skilvirkara þar sem trjóna bílsins verður ætíð jafnhátt frá jörðu en drúpir ekki við bremsun. Renault mun hafa prófað lokagerð þessarar fjöðrunar á æfingum fyrir unga ökumenn í Abu Dhabi kjölfar lokamóts ársins þar á nýliðinni formúlutíð.