Bruno Senna. reuters

Williamsliðið staðfesti í dag það sem þótt hefur liggja í loftinu; Bruno Senna hefur verið ráðinn til að keppa fyrir það á komandi formúlutíð. Móðurbróðir hans, Ayrton Senna, keppti á sínum tíma fyrir sama lið.

Senna leysti Nick Heidfeld af hjá Renault í fyrra en hlaut ekki náð lengur þar sem liðið skipti alveg um ökuþórapar og réði þá Kimi Räikkönen og Sebastien Grosjean.

Hann kemur í stað landa síns Rubens Barrichello og virðist 19 ára formúluferill hans því á enda, nema hann ráði sig til Hispanialiðsins,  en þar er enn laust sæti.

„Það verður áhugavert að aka fyrir liðið sem móðurbróðir minn keppti fyrir því margir þeirra sem hér starfa enn unnu með Ayrton,“ sagði Senna í tilefni ráðningarinnar.

Senna keppti fyrir Renault seinni helming vertíðarinnar 2011. reuters

Barrichello var fljótur að óska landa sínum og vini til hamingju með ráðninguna. „Ég ek ekki Williamsbíl í ár, ég óska félaga mínum Bruno Senna góðs gengis, framtíðin er enn opin . . “ sagði hann í Twitter-færslu.

Liðsstjórinn Frank Williams sagði að liðið hefði skoðað Senna mjög í bílhermi undanfarnar vikur þar sem takmarkað hefði verið hægt að byggja á stuttri keppni hans bæði í fyrra og hitteðfyrra. „Útkoman er sú, að hann er sannarlega hraðskreiður, með gott tæknilegt innsæi og fljótur að tileinka sér það sem hann lærir,“ sagði Williams.