Damon Hill færði Williams tvo titla 1996, ökuþóra og bílsmiða. Renaultvél var í bílnum.

Sjónvarpsstöðvar leggja mikið upp úr því að fá aðstoð fyrrverandi keppnisökuþóra við útsendingar sínar frá formúlu-1. Hefur breska stöðin Sky krækt í einn góðan en hún tekur við útsendingum í Bretlandi af BBC.

Þar er um að ræða Damon Hill, heimsmeistara frá árinu 1996 með Williamsliðinu. Hann mun taka þátt í útsendingum frá 10 mótum af 20 sem álitsgjafi og mun við það njóta reynslu sinnar en hann keppti á sínum tíma í 122 mótum.

Hill verður þar á meðal annarra fyrrverandi breskra keppnismanna úr formúlu-1, þeim  Martin Brundle og Anthony Davidson. Tekur hann þátt í útsendingum frá mótunum í Melbourne, Barein, Mónakó, Silverstone, Hockenheim, Búdapest, Belgíu, Indlandi, Bandaríkjunum og Sao Paulo í Brasilíu.

Damon Hill er gítaristi góður.

Hill tekur aðeins þátt í útsendingum frá helmingi mótanna til að geta sinnt og fylgst betur með framgangi sonar síns Josh, sem fetar í fótspor feðranna með keppni í Renaultformúlunni bresku aftur í ár með Forteliðinu. Afi Josh og faðir Damons, Graham Hill, var á sínum tíma meðal bestu ökuþóra heims.