Liuzzi á ferð á Hispaniabíl.

Enn er einu sæti ökumanns hjá formúluliði óráðstafað. Margir vilja í það komast en sá heppni verður að kaupa það á sex milljónir evra - jafnvirði um milljarðs króna.

Hér er um að ræða annað sætið hjá spænska botnliðinu Hispania. Reyndar hefur Vitantonio Liuzzi samning um að keppa fyrir liðið en hann getur ekki fært því svo mikið fjármagn frá styrktarfyrirtækjum. Og þótt ekki sé kveðið á um það í samningnum segir hann ökumannasamninga ekki meira virði en pappírinn sem þeir séu skrifaðir á því liðin hegði sér eins og þeim sýnist gagnvart ökumönnum þótt samningsbundnir séu.

Margir hafa verið nefndir í tengslum við sæti þetta hjá Hispania, þar á meðal Liuzzi, Rubens Barrichello og Adrian Sutil. Spænska íþróttablaðið Marca segir listann langan en  að fremstur í röðinni standi hollenski ökuþórinn Giedo van der Garde.

Garde hefur keppt í GP2-formúlunni og mun hafa evrumilljónirnar til reiðu. „Ég bíð enn eftir góðum fréttum, bíð framtíðarinnar með jákvæðum hug, æfi mig stíft til að vera sem best undirbúinn,“ hefur hollenska blaðið De Telegraf eftir van der Garde af þessu tilefni.