Lotus mun ekki njóta hinnar nýstárlegu fjöðrunar. reuters

Formúluliðunum hefur verið tilkynnt, að gagnvirk fjöðrun sem Renaultliðið hafði þróað fyrir árið í ár sé óheimil til brúks í keppni. Hefur Alþjóða akstursíþróttasambandið (FIA) bannað slíkan búnað.

FIA tilkynnti liðunum fyrir helgi, að það teldi búnaðinn stangast á við tæknireglur formúlu-1 en hann stýrir jarðfirrð bílsins á bremsusvæðum til að bæta skilvirkni loftafls og auka stöðugleika bílsins.

Áður, snemma árs í fyrra, hafði FIA gefið Renaultliðinu - sem bera mun nafnið Lotus í ár - grænt ljós á að þróa og brúka fjöðrun af þessu tagi. Hefur sambandið ekki útskýrt viðsnúning sinn í málinu.

Þó vitað sé að Ferrari hafi verið langt komið með að þróa eigin fjöðrun af þessu tagi telja fróðir, að líklegast hafi önnur lið lagt sig fram um að sýna og sanna fyrir FIA að búnaður Lotus hafi verið í bága við reglur.

Christian Horner, liðsstjóri Red Bull, sagðist í síðustu viku óviss um ágæti fjöðrunar af þessu tagi. Ágæti keppnisbíls snerist ekki um einstaka íhluti eða kerfi, heldur að heildin öll smylli vel saman.