Ecclestone vonar að drottnun Vettels sé lokið
Ecclestone meðal ökumanna, Vettel l.t.h. reuters
Þrátt fyrir aðdáun sína á Sebastian Vettel hjá Red Bull segist Bernie Ecclestone, alráður formúlu-1, vona, að keppnin verði tvísýnni um titil ökuþóra í ár en í fyrra.
Á síðustu keppnistíð drottnaði Vettel og innsiglaði annan titilinn í röð þegar enn voru fimm mót eftir af keppnistíðinni.
„Það vona ég ekki,“ svaraði Ecclestone aðspurður hvort framundan væri frekari drottnun á kappakstursbrautinni í ár. „Í hreinskilni sagt býst ég allt eins við því, en frekar kysi ég að keppnin um titilinn réðist ekki fyrr en seint í síðasta móti.“
Hvað sem þessu líður þegar á hólminn verður komið kveðst Ecclestone ala þá von í brjósti að einstök mót bjóði upp á mikla skemmtan og gleðja áhorfendur.
