Ferrari kennir nýjum tæknireglum formúlunnar um að 2012-bíll liðsins er ekki sérdeilis fagur, en þar er mest áberandi og óaðlaðandi stallur á trjónunni. Af hálfu liðsins er sagt að bíllinn eigi eftir að taka breytingum við umfangsmiklan reynsluakstur á næstu vikum.

Ferrari hefur ætíð lagt upp úr fagurri bílhönnun og því segir Ferraristjórinn Luca di Montezemolo nýja bílinn ekki „veita mikla gleði“. Bíllinn hefur fengið tegundarheitið 663.

Þetta er 58. formúlubíllinn sem Ferrari smíðar en liðið hefur verið með í keppni í formúlu-1 frá upphafi vega, árið 1950. Fjöðrunarbúnaður hans að framan er alveg nýr frá í fyrra en liðið segir eftir sé að fínslípa hann við reynsluakstur á næstunni.

Framvængurinn er sömuleiðis afbrigði vængs sem prófaður var undir lok keppnistímabilsins í fyrra. Er hann sömu leiðis sagður eiga eftir að taka breytingum við frekari þróun.

Sömuleiðis er hönnun hliðarbelgjanna breytt og kæliristar í þeim eru staðsettar annars staðar en áður. Ennfremur eru kæliloftstrektar frambremsanna staðsettar öðruvísi og breyttar.