Karthikeyan á ferð á bíl Hispania. mbl.is/hispaniaf1

Ekkert sæti er lengur laust fyrir ökumann í formúlu-1 því spænska liðið Hispania hefur ráðið indverska ökuþórinn Narain Karthikeyan til að keppa við hlið Pedro de la Rosa. Fyrir sætið þurfti Karthikeyan að borga 5 milljónir evra, rúmar 800 milljónir króna.

Tilkynnt var um ráðninguna í morgun en Karthikeyan keppti fyrir Hispania fyrri helming síðasta árs en var síðan látinn víkja fyrir nýliðanum Daniel Ricciardo. Reyndar ók hann aftur undir lok vertíðar, eða í heimamóti sínu í Indlandi.

Hispania tekur þátt í fyrstu bílprófunum ársins í Jerez á Spáni í næstu viku. Þar mun De la Rosa sjá um aksturinn en Karthikeyan tekur þátt í annarri bílprófanalotunni, sem fram fer í Barcelona 21. til 24.  febrúar.

Narain Karthikeyan. reuters