Alonso og Massa ásamt Domenicali liðsstjóra við 2012-bíl Ferrari. reuters

Fernando Alonso er með sjóðandi sjálfstraust frammi fyrir nýrri keppnistíð í formúlu-1. Hann segist hafa fulla trú á að færni Ferrariliðsins geri honum kleift að keppa um heimsmeistaratitil ökumanna þegar í fyrsta móti.

Alonso er að hefja sitt þriðja keppnistímabil með Ferrari en litlu munaði að hann ynni titil ökumanna á því fyrsta, 2010. Og í fyrra varð hann að sætta sig við þriðja sætið eftir afar brösuga keppnistíð.

Hann vann aðeins eitt mót í fyrra, 2011, en kveðst sannfærður um að Ferrari hafi smíðað bíl fyrir komandi keppnistíð sem verði þess megnugur að fleyta honum til síns þriðja heimsmeistaratitils.

„Hann er mjög frábrugðinn bíl síðustu tveggja ára,“ sagði Alonso við afhjúpun F2012-bílsins. „Ég geng til leiks af sömu staðfestu sem fyrr og ákveðni, ég vil gera stóra hluti. Við viljum sjá rauðu bílana í pallsæti. Við byrjum reynsluakstur í næstu viku í Jerez og vinnum saman að því marki. Ég er viss um að við munum standa okkur vel í ár.“

2012-bíll Ferrari. reuters

Alonso og Massa svipta hulunni af 2012-bíl Ferrari. reuters