Óvenjuleg aðferð til að fylgjast með keppninni í Barein. reuters

Hópur breskra stjórnmálamanna hefur hvatt Alþjóða akstursíþróttasambandið (FIA) til að hætta við kappaksturinn í Barein vegna pólitískrar ólgu en átök hafa blossað þar upp að nýju.

Lýstu stjórnmálamennirnir - flestir þeirra fulltrúar í lávarðadeild þingsins - þessu viðhorfi sínu í opnu bréfi sem birtist í dag í breska blaðinu The Times. Þar segjast þeir hafa áhyggjur af þeirri ákvörðun forsvarsmanna formúlu-1 að efna til keppni í Barein í apríl.

Segja þeir stjórnmálakreppuna í Barein vera olíu á eld óstöðugleika á Persaflóasvæðinu. Þar skorti allan vilja af hálfu yfirvalda að stuðla að pólitískum sáttum og auknu lýðræði. Fylkingar beggja aðila - yfirvalda annars vegar og lýðræðissinna hins vegar - hafi grafið sér pólitískar skotgrafir. Hættan sé sú að öfgar nái yfirhöndinni og vinni gegn friðsamlegri lausn deilumála.

„Með tilliti til hins viðsjála ástands, daglegra mótmæla á götum úti og dauða óbreyttra borgara, þá teljum við ekki rétt fyrir formúlu-1 að snúa aftur til Barein,“ segja bréfritarar.

Hvorki FIA né alráðurinn Bernie Ecclestone hafa undanfarið sýnst hafa áhyggjur af ástandinu í Barein. Í janúar sagði Ecclestone að ólgan þar væri ekkert til að bera kvíðboga yfir.

„Allir tala heilmikið um þennan heimshluta en Barein er það land á svæðinu þar sem fæst vandamál er við að stríða,“ sagði hann í viðtali við blaðið Salzburger Nachrichten.