De la Rosa á ferð á 2011-bíl Hispania við reynsluakstur í Jerez. mbl.is/hispaniaf1

Dragast mun fram í síðustu bílprófanalotu vetrarins að Hispania geti tekið 2012-bíl sinn í notkun. Smíði bílsins tefst þar sem hann hefur fallið á tvennum árekstrar- og höggprófum.

Hispania hafði áformað að mæta með bílinn í æfingalotu sem hefst í þarnæstu viku í Barcelona en nú er útséð um það. Ætlar liðið að taka sér meiri tíma í að bæta bílinn og fínslípa í verksmiðju sinni.

Af 17 skylduprófum hjá Alþj'oða akstursíþróttasambandinu (FIA) stóðs bíll Hispania 14 en féll á tveimur og eitt prófið gat hann ekki farið í gegnum. Mun aðeins hafa vantað lítilsháttar á að hann stæðis prófin öll. Veltigrindina þarf ögn að styrkja og sömuleiðis trjónuna. Undirvagninn flaug hins vegar í gegn með glans og mun lítið verk að bæta úr ágöllunum sem ollu því að bíllinn fékk ekki fulla skoðun.  

De la Rosa á ferð á 2011-bíl Hispania við reynsluakstur í vikunni í Jerez. mbl.is/hispaniaf1