Nico Rosberg segir við upphaf þriðja samstarfsárs þeirra Michaels Schumacher hjá Mercedes, að samband þeirra hafi verið liðugt og þeir standi jafnfætis innan liðsins.

Er Rosberg gekk til liðs við Mercedes í árslok 2009 stóð hann síðar óvænt frammi fyrir því að hafa mesta afreksmann formúlu-1 sem liðsfélaga. En það einkennilega gerðist, að Þjóðverjinn yngri hafði undirtökin og stóð meistaranum fyrrverandi framar að getu.

Hlaut Rosberg fleiri stig í keppni á fyrsta ári þeirra Schumacher hjá Mercedes og hið sama gerðist í fyrra þótt munurinn væri þá minni á þeim. Það rekur Rosberg aðallega til dekkja og breytinga er galopnuðu ökumönnum tækifæri til framúraksturs.

„Mikilvægi tímatökunnar minnkaði stórlega 2011 og það er helsta skýringin. En Michael var líka betri, geta hans var meiri en 2010. Í upphafi leit ég upp til hans en nú hefur leikurinn jafnast og samstarfið þjálar. Ég virði helgun hans gagnvart íþróttinni og aðkomu. Það er áhugavert að upplifa,“ segir Rosberg í bílatímaritinu Car.