Þess var minnst bæði í Brasilíu og á Ítalíu að í gær, 1. maí, voru 20 ár frá því brasilíska goðsögnin Ayrton Senna beið bana í San Marínó kappakstrinum sem fram fór í Imolabrautinni á Ítalíu þann dag árið 1994.

Keppnishelgin í Imola var með þeim verstu og myrkvustu í sögu formúlu-1 því á æfingum tveimur dögum áður beið austurríski nýliðinn Roland Ratzenberger bana á svipuðum stað í brautinni og landi Senna, Rubens Barrichello, slasaðist í hörðum árekstri.

Senna var þjóðhetja og goðsögn þegar í lifenda lífi. Hann var dáður um heim allan fyrir færni sína á formúlubrautum. Þar þótti hann harður í horn að taka og gaf ekkert eftir. Þótti hann öðrum fremri í að töfra allt út úr bílum sem þeim sem hann ók hverju sinni.

Utan keppni bera keppinautar hans honum allt öðru vísi söguna, segja hann hafa verið hlýjan og mjúkan mann með stórt hjarta og mikla umhyggju fyrir samferðafólki sínu, þar á meðal keppinautunum.

Dánardægurs Senna var minnst með ýmsu móti svo sem meðfylgjandi 25 myndir endurspegla að hluta.