Mick Schumacher, sonur hins sjöfalda fyrrverandi heimsmeistara í formúlu-1, Michaels Schumacher, varð í öðru sæti í heimsmeistarakeppninni í unglingaflokki á körtum, en keppni lauk í Frakklandi um helgina.
„Auðvitað er ég stoltur af svo góðum árangri,“ sagði hinn 15 ára gamli ökumaður. „En það er líka takmarkið að verða heimsmeistari. Þetta var aðeins byrjunin á keppnisferlinum,“ bætti hann við í samtali við franska blaðið Ouest-France.
Mick Schumacher keppti í svonefndum KF-Junior flokki. Mótið fór fram í Aunay-les-Bois í héraðinu Orne. Þar var ökumaðurinn ungi innritaður og skráður til leiks undir ættarnafni móður sinnar, Betsch, til að komast hjá athygli, sem Schumachernafnið ella hefði gert.