Kimi Räikkönen fær alveg nýjan bíl fyrir kappaksturinn í Austin í Bandaríkjunum eftir tíu daga, að sögn ítalska tímaritsins Omnicorse.
Í tilkynningu Ferrariliðsins eftir rússneska kappaksturinn í Sjotsí þar sem hann varð aðeins níundi í mark segir Räikkönen: „(Austin) er mjög krefjandi en áhugaverð braut og ég vona að ég glími ekki við sömu vandamál þar og hér.“
Omnicorse staðhæfir að hinn rólyndi Räikkönen hafi hækkað róminn og slegið í borð liðsstjórans Marco Mattiacci í bílskúr Ferrari í Sjotsí. „Hann gerði þeim það kýrljóst að hann leggi sig 110% fram en að honum takist samt ekki að ná því besta út úr bílnum því það sé eitthvað sem virkar ekki í honum,“ segir blaðið.
Að sögn Omnicorse féllst Mattiacci á að Räikkönen skyldi fá nýjan undirvagn fyrir bandaríska kappaksturinn.