Red Bull ætlar að brúka eina æfingu föstudagsins í Sotsjí til að prófa varnarhlíf um stjórnklefa keppnisbílanna.
Um er að ræða glerhlíf sem umlykur stjórnklefann og þykir öllu látlausari og fegurri en hjálmgrind sem Ferrari prófaði í byrjun mars, við bílprófanir í Barcelona.
Á þessu stigi liggur ekki fyrir hvor ökumanna Red Bull mun prófa hlífina, sem verður einungis á öðrum keppnisbílnum af tveimur.
Formaður félags formúluökumanna (GPDA), Alex Wurz, hefur sagt að hlífin verði að setja öryggi í forgang, fram yfir útlitsfegurð. Alþjóða akstursíþróttasambandið (FIA) áformar að gera kröfur um aukið öryggi í stjórnklefa keppnisbíla allra liða frá og með næsta ári, 2017.