Nico Rosberg hjá Mercedes var í þessu að vinna rússneska kappaksturinn í Sotsjí við Svartahaf. Hóf hann keppni af ráspól og skaust strax langt fram úr öðrum og var aldrei ógnað. Annar varð liðsfélagi hans Lewis Hamilton, rúmum 20 sekúndum á eftir, og þriðji Kimi Räikkönen hjá Ferrari.
Með þessu hefur Rosberg unnið sigur í öllum fjórum mótunum til þessa í ár. Og þar sem hann vann síðustu þrjú í fyrra hefur hann nú staðið á efsta þrepi verðlaunapallsins í sjö mótum í röð.
Hamilton hóf keppni í tíunda sæti og vann sig fljótt fram á við. Kominn í annað sætið þegar keppnin var tæplega hálfnuð hóf hann sókn og minnkaði bilið í Rosberg jafnt og þétt. En hefur reynt um of á Mercedesbílinn því er þriðjungur hringjanna 53 var eftir sagði tæknistjórinn honum að við vandamál væri að etja í kælikerfi vélarinnar. Hægði Hamilton þá ferðina og hélt sæti sínu örugglega þótt Räikkönen minnkaði bilið afar hratt á síðustu 15 hringjunum.
Sebastian Vettel hjá Ferrari hafði gert sér miklar vonir en þær fuðruðu upp í annarri og þriðju beygju er Daniil Kvyat hjá Red Bull ók tvisvar aftan á hann. Endaði seinni ákeyrslan á því að Vettel snarsnerist og endaði með hörku skelli á öryggisvegg. Var hann því úr leik áður en fyrsti hringur var að baki.
Báðir McLaren í stigasæti
Þau tíðindi gerðust, að báðir ökumenn McLaren luku keppni í stigasæti og unnu þar með fyrstu stig sín á árinu. Fernando Alonso átti afar góðan fyrsta hring og vann sig úr 14. sæti í það sjöunda áður en að þriðju beygju kom. Ók hann lengst af á auðum sjó og kláraði keppni í sjötta sæti. Jenson Button átti lengst af í harðri keppni við hóp ökumanna um síðustu stigasætin og lauk keppni í tíunda sæti.
Sömuleiðis hlaut Kevin Magnussen sín fyrstu stig á árinu og Renault þar með líka. Endaði hann í sjöunda sæti. Áttundi varð Romain Grosjean hjá Haas og níundi Sergio Pereez hjá Force India.