Það versta sem komið getur fyrir lið í toppslag formúlunnar er að ökumenn þeirra skelli saman og falli úr leik. Akkúrat það kom fyrir Mercedesliðið í Barcelona í dag og er nú krísa þar á bæ vegna málsins.
Lewis Hamilton missti Nico Rosberg fram úr sér í fyrstu beygju og sótti síðan ákaft að honum og hugðist reyna endurheimta fyrsta sætið í fjórðu beygju hringsins eftir start. Niki Lauda, stjórnarformaður Mercedesliðsins, segir að Hamilton hafi verið of sókndjarfur og árekstur þeirra Rosberg meira honum að kenna.
Liðsstjórinn Toto Wolff var ögn varfærnari og sagði erfitt að meta sök hvors um sig. Dómarar kappakstursins sögðust myndu bíða með rannsókn atviksins þar til eftir kappaksturinn - og hafa ekki lokið henni þegar þessar línur eru skrifaðar.
Hamilton reyndi að sækja innanvert á leið inn í beygjuna en í sömu mund reyndi Rosberg að verja stöðu sína. Við það fór Hamilton út á gras, missti stjórn á bílnum sem snarsnerist og skall á endanum á bíl Rosberg. Höfnuðu báðir út í sandgryfju, settust þar fastir og féllu báðir úr leik.