Sebastian Vettel er á því að áfram verði hætta að vera innbyggð í formúlu-1 eigi íþróttin áfram að þykja aðlaðandi í augum áhorfenda. Vettel hefur fjórum sinnum unnið heimsmeistaratitil ökumanna.
Vettel lét þessi ummæli falla á íþróttaráðstefnu Alþjóða akstursíþróttasambandsins (FIA) í Tórínó á Ítalíu, eftir að hafa verið spurður hvað formúla-1 þyrfti að nota úr fyrndinni til að skapa sér nýja framtíð.
Hann hrósaði framförum í öryggi greinarinnar en sagði að sér fyndist á vanta að áskorun ökumanna væri nóg. Nefndi hann keppnisbrautina í Bakú í því sambandi og sagði að hraði væri einn af hornsteinum íþróttarinnar. „Hraðinn sem við getum farið í beygjur er framúrskarandi og sá kostur bílanna hefur haldist. Áhættuþátturinn hefur að vissu marki verið fyrir hendi og það er það sem gerir formúluna svo spennandi.“