Alain Prost, fjórfaldur fyrrum heimsmeistari í formúlu-1, lýsir útsendingum frá kappakstrinum í Bakú sem „hörmungum“.

Prost var ekki hrifinn af því sem boðið var upp á í sjónvarpssendingum frá kappakstrinum. Brautin hafði verið lofuð fyrir hversu óvenjuleg hún var og umhverfið. Prost segist hins vegar hafa leiðst fyrir framan sjónvarpstækið sitt.

„Þetta var í fyrsta sinn í mörg ár sem ég gat ekki fylgst með æfingunum og tímatöku. Hinn mikli áhugi sem fram kom í samfélagsmiðlum virkaði þannig á mig að fyrir framan sjónvarpið settist ég settist spenntur og fullur eftirvæntingar. Hið eina spennandi sem við blasti var vinstri-hægri beygjan í lok hringsins,“ hefur ítalska blaðið La Gazzetta dello Sport eftir Prost.

„Það var þarna eitthvað sem virkaði ekki. Ungir áhorfendur að mótinu hafa eflaust fyllst þeirri hugmynd að keppni í formúlu-1 sé ekki fjarri því sem þeir upplifa í Playstation,“ sagði meistarinn fyrrverandi og íþróttasendiherra Renault.