Lewis Hamilton hjá Mercedes var í þessu að vinna sinn 55. ráspól á formúlu-1 ferli sínum. Annar varð liðsfélagi hans Nico Rosberg og þriðji Max Verstappen hjá Red Bull.

Hamilton setti besta hringinn í lokatilraun tímatökunnar en tími hans úr fyrri atlögunni í lokalotunni var strikaður út þar sem hann renndi sér út fyrir brautarmörkin í einni beygju og var talinn hafa hagnast á því. Sótti hann enn harðar í lokatilrauninni og setti þá betri tíma en þann sem ógiltur var.

Rosberg átti engin svör við ákefðarhring Hamiltons og varð að sætta sig við annað sætið. Hefur Hamilton því heimakappakstur sinn í Silverstone frammi fyrir löndum sínum í óskastöðu.

Fjórði á rásmarki verður Daniel Ricciardo hjá Red Bull, Kimi Räikkönen hjá Ferrari fimmti en liðsfélagi hans Sebastian Vettel fellur úr sjötta sæti í það ellefta vegna gírkassaskipta. Því færist Vallteri Bottas hjá Williams upp um eitt sæti í það sjötta, Nico Hülkenberg úr því áttunda í það sjöunda,. Fernando alonso hjá McLaren úr því níunda í það áttunda og Carlos Sainz hjá Toro Rosso úr tíunda í það níunda. Loks færist Sergio Perez hjá Force India úr ellefta sæti í það tíunda.