Hockenheim er úr leik sem keppnisstaður formúlu-1 á næsta ári, að sögn framkvæmdastjóra brautarinnar, Georgs Seiler.
Seiler segist ekki hafa náð samningum við alráð formúlunnar, Bernie Ecclestone, og ekki yrði farið út í mótshald er hefði í för með sér mikið fjárhagslegt tap. Þetta þýðir að óbreyttu að mótum næsta árs fækkar í 20.
Seiler sagði að tilraunir til samninga við Ecclestone hafi staðið yfir vikum saman. „Við fengum ekkert tilboð sem ekki fól í sér mikla fjárhagslega áhættu,“ hefur vikuritið Auto Bild eftir honum.
„Þetta eru vonbrigði en ekkert sem á óvart kemur,“ segir Seiler einnig.