Franska ökumanninum Romain Grosjean er ýmislegt til lista lagt. Hann er ekki aðeins sleipur í formúlu-1 því um helgina vann hann fyrsta ísakstursmót vetrarins í frönsku Ölpunum.
Grosjean keppti á Renault Clio bíl fyrir sitt gamla lið DA Racing sem hann keppti með í ísakstrinum 2015. Mótið helgarinnar fór fram í skíðabænum Alpe d'Huez.
Fyrsta umferð helgarinnar af þremur var misheppnuð og varð Grosjean að hætta í henni. Í næstu lotu sló hann hins vegar vel frá sér og varð þá hlutskarpastur og vann um leið heildarkeppni helgarinnar.
Eknir voru átta hringir í lokalotunni og varð Grosjean 0,918 sekúndum á undan næsta manni, Jean-Philippe Dayraut. Meðal keppenda var fyrrverandi formúluþórinn Olivier Panis sem keppt hefur í ísakstri um árabil með góðum árangri.
Þá keppti sem gestur í rafbílaflokki heimsmethafinn og heims, ólympíu- og Evrópumeistarinn í stangarstökki, Renaud Lavillenie og stóð sig með ágætum. Annar afreksmaður að nafni Julien Absalon, sem er fimmfaldur heimsmeistari og tvöfaldur ólympíumeistari á torfæruhjóli, keppti einnig í rafbílaflokknum.
Tilþrif í krókóttri keppnisbrautinni eru mikil og bílarnir lengst af henni á hliðarskriði gegnum beygjum á ótrúlega miklum hraða, svo sem sjá má á meðfylgjandi myndum.