Útlit er fyrir að hugmyndin um grind yfir stjórnklefa formúlu-1 bíla til að veita ökumönnum meira öryggi sé úr sögunni.
Allir ökumenn í formúlu-1 í fyrra prófuðu Halo-grindina svonefndu á æfingum og hlaut hún misjafnar undirtekir. Allt frá því að þykja með öllu óþörf og óþægileg upp í að virðast vera hið ágætasta öryggistól.
Alþjóða akstursíþróttasambandið (FIA) beitti sér fyrir þróun og prófunum öryggishlífarinnar en virðist nú hafa lagt öll áform um hana á hilluna. Sambandið vildi upphaflega að hún yrði tekin upp á keppnisbílunum frá og með 2017.
Loks herma fregnir nú, að keppendurnir sjálfir hafi hafnað hlífðargrindinni í atkvæðagreiðslu. Hafði FIA samband við 22 ökumenn þann 10. janúar síðastliðinn og kannaði hug þeirra. Sextán þeirra höfðu svarað spurningalista í byrjun febrúar. Sjö lýstu andstöðu við Halo, fimm greiddu grindinni atkvæði sitt og fjórir lýstu hlutleysi gagnvart spurningunni.