Nico Rosberg segist hafa kosiðað Fernando Alonso hefði komið í sinn stað hjá Mercedesliðinu því það hefði leitt til skemmtilegrar „flugeldasýningar“ milli þeirra Lewis Hamiltons í mótum.
Rosberg varð ekki að ósk sinni því Mercedes réði á endanum Valtteri Bottas sem arftaka hans. Hann hefur þó aðeins fengið samning til eins árs til að sanna sig, en það vegur gegn Bottas að hann hefur engan kappakstur unnið á ferlinum.
Alonso er almennt talinn einn af albestu ekta kappakstursmönnunum í keppni og tvöfaldur heimsmeistari. Undanfarin tvö ár hefur hann keppt á aflvana McLarenbíl og því ekki blandað sér í toppslaginn.
Hamilton og Alonso voru liðsfélagar hjá McLaren 2007 og segir Rosberg að endurfundir hefðu getað orðið skemmtilegir, en sjálfur átti hann í harðri keppni og harkalegum útistöðum við Hamilton hjá Mercedes.
Hinn nýútnefndi sendiherra Mercedes sagði um þetta í samtali við spænska blaðið Marca, að sem áhugamaður hefði verið gaman að sjá þá kljást með tilheyrandi eldglæringum. En fyrir liðið hefði það ekki gengið upp að hafa þá saman í skiprúmi.
„Liðið hefur fundið frábæra lausn, Bottas er hraðskreiður og þótt Hamilton verði á háu nótunum og afar erfiður andstæðingur að leggja þá hef ég sýnt og sannað að Valtteri á að geta það.“