Þýska tímaritið Bunte var í dag dæmt til að greiða þýska ökuþórnum fyrrverandi Michael Schumacher 50 þúsund evrur [5,8 milljónir íslenskra króna], auk lögfræðikostnaðar, í skaðabætur. Blaðið hélt því fram að Schumacher gæti gengið að nýju eftir slys.
Schumacher lenti í alvarlegu skíðaslysi í lok árs 2013 þegar hann féll og lenti með höfuðið á steini. Honum var haldið í dái svo mánuðum skipti og óttast var um líf hans lengi vel. Síðan hann kom úr dáinu hefur hann verið í stöðugri umönnun á heimili sínu í Sviss.
Bunte hélt því fram í desember árið 2015 að Schumacher hefði náð undraverðum bata. „Þetta er meira en jólakraftaverk – Michael Schumacher getur gengið að nýju,“ stóð í fyrirsögn blaðsins.
Dómstóll í Hamburg komst að þeirri niðurstöðu að áðurnefnd grein hefði brotið gegn friðhelgi í einkalífi Schumachers og blaðið því dæmt til sektargreiðslu.
„Niðurstaðan var sú að fyrirsögn blaðsins er ekki sönn,“ sagði dómari í málinu. Niðurstaðan byggir á því að Schumacher getur ekki gengið núna og hefði því ekki heldur getað gengið fyrir einu og hálfu ári.