Sonur þýska ökuþórsins fyrrverandi, Michael Schumacher, mun aka í einum af bílum föður síns fyrir formúlu-1-kappaksturinn í Belgíu á sunnudag. Þá eru liðin 25 ár síðan Schumacher vann sína fyrstu keppni.
Að sögn skipuleggjenda keppninnar mun hinn 18 ára gamli Mick Schumacher, sem keppir í formúlu-3, keyra nokkra hringi á brautinni áður en keppni hefst.
„Það var aldrei vafi í huga mér að mig langaði að gera þetta,“ kom fram í yfirlýsingu frá Mick vegna málsins.
Eftir að Michael vann fyrstu keppni sína í Belgíu fyrir aldarfjórðungi vann hann 90 keppnir í viðbót.
Michael Schumacher lenti í alvarlegu skíðaslysi í lok árs 2013 þegar hann féll og lenti með höfuðið á steini. Honum var haldið í dái svo mánuðum skipti og óttast var um líf hans lengi vel. Síðan hann kom úr dáinu hefur hann verið í stöðugri umönnun á heimili sínu í Sviss en hefur ekki sést opinberlega síðan hann slasaðist.