Kappaksturinn í Suzuka í Japan snerist upp í martröð fyrir Sebastian Vettel hjá Ferrari. Til að kóróna allt var hann víttur fyrir að hafa ekki mætt og hlýtt á þjóðsöng Japans leikinn.
Í yfirlýsingu dómara kappakstursins sagði, að 14 mínútum fyrir ræsingu beri öllum ökumönnum að mæta við framenda rásmarksins og standa þar meðan þjóðsöngur viðkomandi lands er leikinn.
Vegna vélarvanda í bíl Vettels fyrir kappaksturinn var Vettel upptekinn með tæknimönnum sínum og mætti ekki á sinn stað fyrr en þjóðsöngurinn var hálfnaður í flutningi. Það töldu dómarar mótsins ámælisvert og víttu hann formlega.