Cabanas hugsar um HM með byssukúlu í höfðinu

Salvador Cabanas. Reuters

 Salvador Cabanas, sóknarmaður paragvæska landsliðsins í knattspyrnu, er á batavegi eftir að hann var skotinn í höfuðið á veitingastað í Mexíkó þann 24. janúar s.l. Cabanas, sem er 29 ára gamall, er leikmaður mexíkóska liðsins America og í gær sagði forseti félagsins Michel Bauer að Cabanas væri staðráðinn í því að leika með landsliði Paragvæ á heimsmeistaramótinu í Suður-Afríku í sumar þrátt fyrir að læknum hafi ekki tekist að ná byssukúlunni úr höfði hans. 

„HM er það eina sem kemst að hjá honum í samtölum við lækna, og það er gott. Hann hefur sett sér markmið og það hvetur hann til dáða,“ sagði Bauer m.a. við fjölmiðla í Mexíkó í gær.  Cabanas komst til meðvitundar um s.l. helgi og getur hann hreyft bæði fætur og hendur, og heilastarfssemi hans virðist eðlileg. 

Cabanas var markahæsti leikmaður Paragvæ í undankeppni HM, og þar skoraði hann 6 mörk.