Veigar Páll í vígahug

Veigar Páll Gunnarsson er í stóru hlutverki hjá Stabæk. mbl.is/Brynjar Gauti

Veigar Páll Gunnarsson, landsliðsmaður í knattspyrnu, var á skotskónum með Stabæk þegar liðið vann Molde í gær, 2:1, í æfingaleik norsku úrvalsdeildarliðanna.

Veigar skoraði bæði mörkin snemma í síðari hálfleik og var sagður besti maður vallarins á vef Stabæk. Hann var tvívegis nálægt þrennunni en skaut í þverslá í annað skiptið. Bjarni Ólafur Eiríksson var í liði Stabæk og Pálmi Rafn Pálmason kom inná í seinni hálfleik. Þetta var síðasti æfingaleikur Stabæk sem mætir Odd Grenland í fyrstu umferð úrvalsdeildarinnar næsta sunnudag.