Bjarni fékk rauða spjaldið

Bjarni Þór Viðarsson í leik með 21-árs landsliðinu. mbl.is/Eggert

Bjarni Þór Viðarsson, leikmaður 21-árs landsliðsins í knattspyrnu, fékk rauða spjaldið í gærkvöld þegar lið hans, Roeselare, mætti Club Brugge í belgísku deildakeppninni í gærkvöld.

Bjarni og Hólmar Örn Eyjólfsson voru að vanda í byrjunarliði Roeselare sem beið nauman ósigur á útivelli gegn næstefsta liðinu í deildinni. Club Brugge skoraði sigurmarkið, 1:0, rétt fyrir leikslok. Þá voru leikmenn Roeselare orðnir manni færri eftir að Bjarna var vísað af velli fyrir brot á 73. mínútu. Hólmar lék allan leikinn í vörn Roeselare.

Lið þeirra á einn leik eftir, heimaleik gegn Westerlo, og getur forðast fall með sigri, takist Lokeren ekki að vinna Belgíumeistara Anderlecht á meðan. Lokeren er með 18 stig en Roeselare 17 fyrir lokaumferðina. Ekkert lið fellur beint úr deildinni þar sem lið Moeskroen varð gjaldþrota og hætti keppni.

Næstneðsta liðið fer í umspil og Roeselare og Lokeren bítast um að sleppa við það. Ljóst er að  Bjarni mun þurfa að taka út leikbann og missir því af þessum mikilvæga leik gegn Westerlo.