Ísland áfram í átjánda sæti
Kvennalandsliðið er númer 11 meðal Evrópuþjóða. mbl.is/Algarvephotopress
Íslenska kvennalandsliðið í knattspyrnu er áfram í 18. sætinu á nýjum heimslista FIFA, Alþjóða knattspyrnusambandsins, sem gefinn var út í morgun.
Íslenska liðið er rétt á eftir Finnum sem eru í 17. sætinu, en þeir höfðu sætaskipti við Hollendinga sem nú eru í 16. sæti. Úkraína er síðan í 19. sætinu, aðeins einu stigi á eftir íslenska landsliðinu.
Sömu þjóðir skipa fjögur efstu sætin og síðast, Bandaríkin, Þýskaland, Brasilía og Svíþjóð, en íslenska liðið lék einmitt við bæði Bandaríkin og Svíþjóð í Algarvebikarnum á dögunum. Japan lyftir sér upp og er nú jafnt Norður-Kóreu í 5.-6. sætinu á listanum.
Frakkar, mótherjar Íslendinga í undankeppni HM síðar á árinu, fará upp um eitt sæti og eru nú jafnir Englendingum í 8.-9. sæti. Þá fer Kanada upp um tvö sæti, í 10. sætið, uppfyrir Danmörku og Ítalíu.
Ísland er áfram í 11. sætinu yfir bestu Evrópuþjóðirnar.
Serbía, næsti mótherji Íslands í undankeppni HM þann 27. mars, er í 39. sæti heimslistans og fellur um eitt sæti síðan síðast. Króatía, sem er mótherji Íslands 31. mars í sömu keppni, stendur í stað í 53. sætinu. Eistland, sem einnig er í HM-riðlinum, fellur um fimm sæti og er í 81. sæti heimslistans.
