Arnór loksins af stað á ný

Arnór Smárason í leik með landsliði Íslands. mbl.is/hag

Arnór Smárason, knattspyrnumaður hjá Heerenveen í Hollandi, hefur loksins fengið leyfi til að æfa á ný með aðalliði félagsins eftir að hafa verið frá keppni allt tímabilið vegna meiðsla.

Arnór hefur ekkert spilað síðan hann lék með A-landsliði Íslands gegn Hollandi og Makedóníu í undankeppni HM í júní síðasta sumar. Á síðasta tímabili var hann búinn að vinna sér fast sæti í aðalliðshópi Heerenveen og skoraði 5 mörk í 21 leik í úrvalsdeildinni.

Arnór, sem er 21 árs gamall framherji, hefur verið á séræfingum hjá sjúkraþjálfara félagsins undanfarnar vikur en var útskrifaður þaðan á dögunum og hóf í framhaldi af því æfingar með aðalliðinu. Lið Heerenveen siglir lygnan sjó um miðja hollensku úrvalsdeildina.