Arnar á leið í bikarúrslitaleik

Arnar Þór Viðarsson er lykilmaður á miðjunni hjá Cercle Brugge. mbl.is/Golli

Arnar Þór Viðarsson er feti frá því að komast í bikarúrslitaleik belgísku knattspyrnunnar eftir 3:0 sigur Cercle Brugge á Roeselare, liði Bjarna Þórs bróður hans, í fyrri undanúrslitaleik liðanna í kvöld.

Ekkert varð af því að bræðurnir mættust að þessu sinni því Bjarni fékk rauða spjaldið í leik Roeselare um helgina og var þar af leiðandi í leikbanni í kvöld. Arnar Þór lék allan leikinn á miðjunni hjá Cercle og Hólmar Örn Eyjólfsson lék allan leikinn í vörn Roeselare.

Engu munaði að Hólmari tækist að minnka muninn í 2:1 í byrjun síðari hálfleiks þegar hann átti hörkuskalla eftir hornspyrnu en boltinn sleikti markstöngina hjá Cercle.

Liðin mætast aftur á heimavelli Roeselare 26. mars og þá ræðst endanlega hvort þeirra leikur til úrslita um bikarinn gegn Gent eða Mechelen.