Mexíkó lagði Norður-Kóreu

Cuauhtémoc Blanco fagnar marki sínu gegn Norður-Kóreu. Reuters

Mexíkó, sem mætir Íslandi í vináttulandsleik í knattspyrnu næsta miðvikudagskvöld, sigraði í nótt lið Norður-Kóreu, 2:1, í vináttuleik í Torreón í Mexíkó. Báðar þjóðirnar leika á HM í Suður-Afríku í sumar.

Cuauhtémoc Blanco, einn reyndasti leikmaður Mexíkóa, kom þeim yfir á 51. mínútu. Hann er 37 ára gamall, lék sinn 109. landsleik og skoraði sitt 38. mark fyrir Mexíkó.

Kum-Chol Choe jafnaði fyrir Norður-Kóreu sex mínútum síðar. Það var síðan Javier El Chicharito Hernández sem skoraði sigurmark heimamanna á 69. mínútu, 2:1.

Þetta var þriðji sigur Mexíkóa í jafnmörgum upphitunarleikjum fyrir HM en fyrr í þessum mánuði burstuðu þeir Bólivíumenn, 5:0, og unnu síðan Ný-Sjálendinga, 2:0. Báðir leikirnir fóru fram í Bandaríkjunum, eins og leikurinn við Ísland sem verður leikinn í Charlotte frammi fyrir nálægt 70 þúsund áhorfendum.