23 stuðningsmenn Herthu Berlin í bann

Stuðningsmenn Herthu Berlin hlaupa inn á völlinn. Reuters

Þýska knattspyrnuliðið Hertha Berlin hefur sett 23 stuðningsmenn liðsins í þriggja ára bann frá leikjum liðsins eftir að þeir gerðu uppþot á ólympíuleikvangnum í Berlín um síðustu helgi þegar Hertha beið ósigur gegn Nurnberg.

Eftir að Nurnberg skoraði sigurmarkið í uppbótartíma stukku um það bil 100 stuðningsmenn Herthu-liðsins inn á völlinn þar sem þeir hlupu á eftir leikmönnum liðsins, gerðu að þeim aðsúg og skemmdu eigur félagsins.

Þýska knattspyrnusambandið vinnur að rannsókn uppþotsins og forráðamenn Herthu Berlin greindu frá því í dag að 23 stuðningsmenn liðsins hafi verið settir í bann sem gildir til þriggja ára.

Hertha Berlin, sem Eyjólfur Sverrisson var á mála hjá í nokkur ár, situr á botni þýsku 1. deildarinnar og blasir fallið við félaginu en það er 5 stigum á eftir Freiburg og 8 stigum á eftir Hannover.